في التنمية البشرية..خبرات عملية من" امرأة ".." عصرية"
من المطبخ:
كيف تقتح علبة صلصة!
أحيانا كثيرة يستعصي علي فتح برطمان الصلصة أو المربي ، أو أي برطمان أي حاجة المحتوي مش هو المشكلة ، علي غير العادة لأول مرة،
الحقيقة لا أعرف لماذا تحديدا، هل لضعف قوايا التي هدها الزمن ، وشغل البيت، والعيال، وا.....ولا بلاش، ولا فعلا أصبحت الشركات تهتم بطريقة أو بأخري بصحتنا ، وتحرص علي انتاج عبوات مفرغة من الهواء ، لحفظ الطعام من تكون الميكروبات وخلافه؟
آه ، لقد تذكرت الآن ، وأنا اسجل خبراتي ، حشرة صغيرة وجدتها في آخر برطمان مربي فتحه السنة اللي فاتت، لذا علي بموضوعية أن أرجح السبب الأول،ما علينا
المهم،
بخاصية "العناد الانثوي" المناظرة للخاصية الشعرية كده، أحاول طبعا،
أحط الغطا تحت الماء الساخن علشان يتمدد المعدن؟؟؟
يظهر الازاز شاطر هو راخر وبيتمدد معاه،
طيب اسخنه ع النار؟؟؟؟ ح اتلسع!
ماذا أفعل؟
آه ، تظنون أن علي طلب مساعدة خارجية!
الستات العاقلة- زي الناس الطيبين بتوع طلب الله يرحمه ما يعملوش كده،،ليه؟؟
تجنبا لخيبة الأمل، والنرفزة وردود الأفعال غير " المناسبة" في حالة الفشل، وتجنبا للبغددة، والشعور اللامتناهي بالقوة والتفوق والريادة ، في حال النجاح،
والحكاية كلها برطمان صلصة...مش مستدعية يعني !
طب وبعدين،
بعد جهد جهيد ، وبعد أن أتمتم بكل الأدعية التي تسعفني وتركب علي هذا الموقف ، كانت بتتفتح وخلاص،
وفي مرة من ذات المرارير ، فتح باب النقاش ، في الشغل، حول هذا الموضوع الحيوي الخطير،كيف تفتحي برطمان صلصة؟
فانبرت احدي الزميلات الفاتنات وقالت لنا سر حصري، تعلمته من زوجها " السابق"،، أهي حاجة عدلة طلعت بيها منه ،،منه لله....ولا بلاش!
المهم قالت في هدوء وقد أحاطتها الشلة، مبحلقات العيون، مفتوحات الأفواه، متنمرات لكبسها بعد ما تخلص كلام، بانها طريقة بايخة وغير عملية ومكلفة، ومتعبة ، و...
المهم الست قالت ، قال ، ايه، تجيبي سكينة..وتدبحي ...لا لا لا سوري..تجيبي سكينة وتثقبي بها الغطا المعدني، خبطة خاطفة كده من فوق، ثقب صغير ، سيكون له مفعول السحر!!!
ها؟ آه صحيح...علميا ح يتساوي الضغط ، أو يزيد من ، والي،،،، حيث،،، وعندها، ،،،يعني،،،آه ،،،،في حاجة شبه كده خدناها في العلوم
وبعقليتي العلمية المعملية الفذة قبلت كلامها علي عواهنه، بس اضمرت التجربة طبعا، فالتجربة خير برهان،
اشتريت البرطمان، وفي البيت، حاولت الأول افتحته عادي، علشان أديله فرصة كاملة في اثبات حسن النية، ولما استعصي حضرته...غزيتها..أيوة أنا غزيتها
وعندها.....تك...اتفتح الغطا بلفة صغيرة ...بيس أف كيك.....وااااااااااو
انه حل سحري، عبقري!!!
يا كل من تاعبه اوي تلاحم البرطمان مع غطاه، وتشبثه به باصرار،
يا كل من يتطلع ملهوفا، الي الصلصة، أو المربي،أو حتي شرائح الرنجة
الحل احداث ثقب صغير بآلة حادة..بس!
هذا الكلام ينطبق علي كل برطمان، وعلي كل غطا..
برطمان الصلصة..
" شهد" البلد، وغطاها : النسيج الوطني...
الثورة والتغيير
اصلاح التعليم والمعلمين
الهيئة ومراجعينها
والحدق يفهم...بس خلاص!
