من حق الحمار يتجوز

من حق الحمار يجوز

يا عاكشة قلبى بسنارة
ربطالى قيد عاملة إشارة
فى كل مربط وقفالى
و قلبى زربع يا حمارة

فى نفسى قربك يحلالى
و تبقى جنبى و حلالى
و أقل مربط يجمعنا
برسيم و فول يا هنيالى

حصاوى أخوك بيبعدنى
و جحشة أختك توعدنى
مفيش ف قلبك غير حبى
موافقة أمك تسعدنى

فى كل يوم لابسة غبيطك
و نفسى أورث قراريطك
نملاها كسب و تبن و فول
و غيطى يكبر من غيطك

أبوك دايما يماطلنى
و من وصالك يحرمنى
عايز طوالة خمس حلقات
ف زريبة ناوى يقاسمنى؟

و بردعة مكسية بخيش
و حدوة فضة عشان متعيش
و إيه و إيه طلباته كتير
باين قوى دا نظام تطفيش!

فاكرنى أهبل قوى و عبيط
حرامى يعنى و ناهب غيط
قوليله يرجع للماضى
كانت جوازته يا دوب بغبيط

و بكره عايز منكم رد
طواله جاهزة لجوز أو فرد
و عمرى ماكل علفة حرام
و تعرفونى هعيش ع الأد

ليلتها هلبس بردعتى
أشيل لجامى و مرشحتى
أسمع نهيقك عند الباب
أدخل و أبرطع على راحتى

محلول و جايلك يا حبيبة
و الحب ماعرفشى العيبة
هتبقى ليلة ما شافها حمار
و هيصة ما شافتها زريبه

هاء هاء هاء هاء
السعيد حافظ.. من ديوان حماريات

عزيزي / السعيد
تحية من القلب
تحية تقدير واعجاب بحمارياتك الفلاحي
وقدرتك علي توظيف الصور واستخدام الادوات بشكل سلس جذاب
أيها الفلاح المتمرس والخبير بشئون الحمير والزرايب
ياصاحب القدرة الفئقة علي استخدام الرمز
كم أتوق الي التعرف اكثر علي ديوانك
شكرا