إفرحي يا أم الشهيد
دا النهاردة يوم جديد
يوم زرعوا فى الروح الكرامة
شالوا من يومنا الغيامة
من هنا ليوم القيامة
دمهم قناديل تقيد
إفرحي يا أم الشهيد
اليوم بنختار الرئيس
كبّري وإدعي الحبايب
واللي وقت الشدة خافوا
واللي هربان واللي غايب
ابعديهم عن فرحنا
ضعفهم سبّب جروحنا
إبعديهم خلّي روحنا
تعزف الأحلام نشيد
إفرحي يا أم الشهيد
اليوم بنختار الرئيس
إفرحي وزيدي البشاير
وإفردي حضنك أمان
دا العريس فى الجنة طاير
حلمنا كان زي حلمه
حققه هو بدمه
إكتبي فى المجد إسمه
وإعلني فى الأرض عيد
إفرحي يا أم الشهيد
اليوم بنختار الرئيس
