عرض للطباعة
اذا سألوني يعني ايه جودة؟
بقول يعني المدرسة تحقق المعايير القياسية المطلوبة ،
طبعا بيفتحوا عنيهم ، وساعات بقهم ويسألوني، الا ايه هي المعايير دي رخرا؟
أقولهم دي المحكات اللي بنعرف من خلالها الجودة متحققة في المدرسةولا لأ؟
آه
نوررت المحكمة
يعني الحكاية هي : البيضة والفرخة
وبدل ما أوضح المسألة عقدتها؟
حد فاهم العلاقة بين الجودة والمعايير؟
تعالوا سوا نفض الاشتباك
( ربنا يستر)
أنا رأيي ان الجودة هي الفرخة
( المربربة الجميلة اللي كلنا بنجري وراها دي ،،،ما علينا)
الفرخة...أقصد الجودة
هي الأصل
هي الأمل
جودة التعليم مني عين كل مهتم بمصر،
بأمن مصر القومي!
يعني ايه تعليم جيد؟
يعني ايه جودة التعليم؟
لا بقي ....ده موضوع كبييييييير
لكن يعني خلاصة الخلاصة: التعليم يبقي تعليم،
مدرسة منضبطة ( نظيفة طبعا)، معلمين معلمين بجد بيعملوا اللي عليهم بذمة،
طلبة جادة ، مهتمة، مركزة ومستفيدة، بتتعلم بجد، في الفصل والمعمل والمكتبة، وحجرات النشاط،
ادارة متفهمة قيادية، تدير الموقف بحب واحترام ، وتفاني،
وبغض النظر عن المباني والكتب والكشاكيل ، في النهاية ألاقي:علاااااام ،
علااااام بجد
بس بقي الحلم الجميل ده ح يتحقق لوحده؟
ببركة دعا الوالدين ، بس؟
مش ممكن طبعا
يبقي لازم نعمل حاجة،
طب نعمل ايه؟أو ايه اللي لازمن نعمله؟
( زي اسال مرة عليا ، اسال عليا مرة، اختلاف جوهري ادي الي اعادة الصياغة!)
تعالوا نفكر
وماله نفكر،،،
صلوا ع النبي
عليه أفضل الصلاة والسلام
ايه هي مواصفات المتعلم المطلوب؟ المتعلم الجيد؟
ايه هي الشروط اللي لزمن تتوفر فيه علشان يحقق طموح البلد فيه؟ ( وأمه وأبوه وروحه ع الماشي)
من حيث ايه؟
آه من حيث ايه صحيح؟
من حيث "كله"، مش التربية شاملة: الجوانب المعرفية والمهارية ، وطبعا الوجدانية؟
أكيد،
خلاص
تعالوا نشوف ايه اللي لزمن يتوافر في " خريج " المدرسة، ايه اللي لازم يعرفه وايه اللي لازمن يكون قادرا علي أدائه، وايه القيم والاتجاهات اللي لزمن يكتسبها تجاه نفسه ومدرسته ووطنه والناس والحياة؟
الحاجات دي ....
لو اتكونت عنده بعد ما يطلع من المدرسة طبعا، او بمعني أدق نتيجة وجوده بالمدرسة- يبقي الخريج ده، النتاج ده ، جيد، مضبوط ، مناسب،
الحاجات دي انا ح أقيس عليها " العيل"؟
بالضاااااااااابط.....لو لقيناها متوفرة ....يبقي تمام
الحاجات دي هي المحكات : هي اللي ح تساعدني في اصدار الحكم عليه
جيد ولا مو جيد
الحاجات دي هي المعايير؟؟؟؟؟؟؟؟؟؟؟؟؟؟؟
هييييييييييه وصلنا!
يعني المعايير وضعت كوصف للصفات والخصائص المطلوبة في المنتج الجيد ،
برافو!
ودي تستخدم في مهمتين متكاملتين:
1- البناء:: يعني اعرف انا عاوزة ايه، ايه اللي لازم يتعمل، أقوم واضعة له خطة للعمل
مثال: الطالب في المرحلة الابتدائية لابد أن يتعرف علي المهارات الأساسية للغة العربية
أصيغ للمعيار ده هدف وأدور ازاي أحققه
وده اللي بنعمله في خطط التحسين، ( ودي عاوزة موضوع لوحدها)
2- التقييم: قلنا المعايير محكات للحكم علي جودة الشيء، هنا بقي نجيب مازورة الأدوات المناسبة ونقيس المنتج علي المواصفات، الطالب علي معاييره،،،،كل ما حقق نسبة أكبر في المعيار كل ما قرب من الجودة،،( طبعا أنا بحدد مستوي الجودة اللي عاوزاها، يمشي معايا 65% أنا حرة، أصمم علي 85% براحتي، كل واحد وجودته بقي)
كلام جميل؟
جميل جدا!،
لكن
الا ايه هيا بقي المعايير؟؟؟؟؟؟؟؟؟؟
يالهوي!
استاذه علا
عجبنى أوى موضوعك
وأسلوبك وتشبيهاتك
برافو عليكى
رزقك الله الخير في الدنيا والاخرة ..اللهم آمين
وجزاك الله خيراً
الخدمة الجيدة ..تحتاج الى التسويق الاجود
مع خالص تقديرى لشخصكم الكريم
ابوبكر احمد العملة
عضو فريق مجتمع المعرفة المصرى
أستاذة/ نيفيناقتباس:
المشاركة الأصلية كتبت بواسطة نيفين محمد
شرفني مرورك الكريم، وتشجيعك المحفز
شكرا لك
اقتباس:
المشاركة الأصلية كتبت بواسطة أبوبكر أحمد العملة
شكرا لمرورك يا أخي أبو بكر
الاستاذة الفاضلة
صاحبة الابداع والاقناع
أحييكي على هذا الموضوع الاكثر من رائع
وربنا يوفقك في اقناع كل هؤلاء
أستاذي الأستاذ / أشرف
شرفني مروركم الكريم المشجع
آن الأوان لأن تستخدم المعايير في البناء قبل أن تستخدم للقياس