الربيع ابتدي من يناير
قالولنا دايما في الشتا
الجتة تبقي مفتتة
والفكرة تبقي مشتتة
والضحكة مغموسة ف دمعة
والعزم يبقي في الحضيض
ماهو هو أصل البرد قاسي
وقلبه مخلوق من حديد
قالولنا دايما في الشتا
الشمس تبقي مستحية
ساعتين يدوب، والمغربية
تيجي تغلق في البيبان
والوحشة تدخل من المغارب
وتملي قلب البيت عقارب
تملاه سحالي..تملاه ديدان
قالولنا دايما في الشتا
بيتك يا حي أولي بيك
ولا تلزمك بصة شبابيك
ولا تلزمك دقة مزازيك
لا تقول ده صاحبي ولا جاري
ولا تقول كان معايا في يوم شريك
مصلحتك انت أولا
هي اللي لزمن ح تناديك
قالولنا كن في الشتا
ومد رجلك بس علي قد اللحاف
هو لحافك اللي ليك
اياك ح تحلم تفرده ،وتنجده..
وتنط في بحر الأماني، وتجري بيك
اياااااك ، ده قدرك ، قسمتك،
لزمن تحبه وتحمده ،مهما يضيق
قالونا لما يطول الشتا،
وتنغصك لسعة آلام
أحلي حل ليك يا صاحبي انك تنام
غمض عنيك واحلم .مهما تحلم لا ملام
يمكن تلاقي حتة دفا، ولا لقمة، ولا هدمة،
ولا مزة،،أي لذة والسلام
المهم بس يا همام
ان الحلم يبقي "هس" من غير كلام!
قالوا وقالوا ع الشتا ونيمونا بالكلام
نمنا زي ماناموا السلاحف،ألف عام،
نمنا في سعادة وف هنا
نمناهم ف ضنا ، نمنا ف الآلام
المهم ان احنا نمنا وتوهونا في االمنام
ناموا أهل الكهف ناموا
بس صحيوا م الصقيع
واللي ما قالولناش عليه
ان من قلب الشتا... ممكن بيتخلق ربيع
لا ده كمان ممكن شتا يبقي شرنقة الفراشة
سقعته وبرد قلبه ينضحوا دفيء وحماسة
قالوا دايما في الشتا خليك مسير
بس شبابنا في الشتا قالوا نغير
تعالي اشكي بلوتك وع الحق دور
اصرخ بعزم قوتك لكرامك اثأر
الشتا مش بالشهور
أمشير وطوبة أو يناير
الشتا عجز القلوب
الشتا سقعة مشاعر
ناس كتير ...من قلب أحضان الشتا صاروا شموس
نارها صهرت حاجز الخوف اللي كلبش في النفوس
ونورها طارد أشباح الظلام وعباد المراكز والفلوس
ناس كتير من قلب أحضان الشتا قادوا ضماير
هبت وصحت كل ناعس، كل لاهي ،كل حاير
جمعوهم وكان وقودهم الوفا
نظموهم وكان قائدهم الدفا
من عز قلب الشتا اشعلونا بالربيع
نبتوا فينا الشباب..الشباب اللي من طول الليالي ..والصقيع .. كاد يضيع
هزوا بكفاحم عروش بليدة جمدت فينا الخيال
وصمدوا وفضلوا يهزوا فيها...
لما حققوا الحلم المحال
نفخواأنفاسهم جريئة، وضحوا بأرواحهم بريئة
ونسونا بالآمال
ورغم الشتا ، اتحقق الحلم الجميل
راية وطننا رفرفت وسط الميدان
حررنا مصر ،ونار الحق خوفت الغيلان
عن الشتا، وبرد الشتا
ياما قالوا كتير زمان
بس من يومنا ورايح
الشتا ما لوش مكان
الربيع جي بوروده، جي بسنابله والغيطان
الربيع ابتدي من يناير، لما بقي آن الأوان
